#24: S isch Wiehnacht

Chum isch Halloween verbi,

zücht im Lade d Wienacht i:

Wienachtsdeko, Gschenkpapier,

Guetzliteig und Wienachtsbier.

Wenn au d Ziit no nöd ganz stimmt:

S schmöckt noch Guetzli, s schmöckt noch Zimt.

S isch Wienacht, säged ali Sinn.

Wenns würklich so wiit isch,

denn gspürsch es i dir drin.

Liechterchette, Santa Claus,

s blinket au a üsre Stross.

Dä Samichlaus bringt Säckli, yes!

D Pöstler sind im Päcklistress.

Überall lauft Christmaspop,

dehei, im Kafi und im Shop.

S isch Wienacht, säged ali Sinn.

Wenns würklich so wiit isch,

denn gspürsch es i dir drin.

Wa mä vo dä Wienacht merkt:

Überall die Wienachtsmärkt.

Bummle, luege, denn en Punsch,

s Gotti frogt: «Häsch du en Wunsch?»

I denk: «Ou, wa schenk denn i?»,

gang grad hei und bach für sie.

S isch Wienacht, säged ali Sinn.

Wenns würklich so wiit isch,

denn gspürsch es i dir drin.

Noten: textfischer.ch